Agimat

Mahirap paniwalaan ang agimat. Sinasabing nagbibigay ng kapangyarihan sa tao ang agimat, at sa pamamagitan nito ay lumalakas ang tao upang salagin ang bala, makabighani ng binibini, makagapi sa kaaway, at makapagtanghal ng kagila-gilalas na mahika. Agimat ang tagapamagitan ng dimensiyong pisikal at dimensiyong sobrenatural, at upang maganap ito ay kinakailangang taglayin ng agimat ang dalawang katangian: ang habang-alon [wave length] ng materyal na realidad at ang habang-alon ng espiritwal na realidad. Ibig sabihin, dapat makapasok sa dalawang dimensiyon ang agimat—ayon sa paniniwala ng tao—at kung paano nangyayari ito ay isang kababalaghan.

Ngunit bago maganap ito, ang isang bagay, gaya ng kuwintas, susi o panyo, ay kinakailangang magkaroon muna ng di-karaniwang kapangyarihang ikinabit ng isa ring puwersang sobrenatural. Ang isang bagay ay walang kapangyarihang magluwal ng sariling kapangyarihang sobrenatural, dahil kung magkakagayon ay maipapalagay na nakahihigit iyon sa tao at hindi dapat tawaging “bagay.” Ang puwersang ito ay maaaring nagmumula sa isip, dahil ang isip ay maipapalagay na makapangyarihan bago pa man nalikha ang tao. Ang isip ang nakapagbibigay ng sagisag sa isang bagay upang ang karaniwang kuwintas, susi o panyo ay malampasan ang nakagawiang pakahulugan, pahiwatig, at pagkakagamit (o silbi nito) at magkarga ng kaisipang matalik sa lumikha at sa tao na gumagamit ng agimat. Halimbawa, ang isip na naglatag ng paniniwalang ang antigong singsing ay makagagayuma sa sinumang dalaga ay maaaring kinakargahan ang singsing ng lakas sa bisa ng paniniwala ng tagapagsuot ng singsing. Kailangang paniwalaan ng serye ng mga tao ang bisa ng agimat, at makulayan ng kung ano-anong sabi-sabi at guniguni mula sa madla upang ang relikya ng nakalipas ay matagumpay na makairal sa makabagong panahon.

Ang isip ay maaaring likha ng tao o kaya’y ng Maykapal. Ipinapalagay dito na ang Maykapal bilang Dakilang Isip ay maaaring makapili ng isang bagay na makakargahan niya ng kapangyarihan upang ang kapangyarihang ito ay magamit ng tao saanman niya naisin. Ngunit maaaring hindi kinakailangang gawin ito ng Maykapal—kung ipagpapalagay na ibinigay na niya ang lahat sa tao at ganap ang talino, kakayahan, at kapangyarihan nito para magtagumpay sa hamon ng kalikasan—maliban na lamang kung hindi sapat ang kakayahan ng tao upang lampasan ang aba niyang kalagayan. Ang tao bilang Mortal ay maipapalagay na may hanggahan dahil sa katangiang pisikal, kaya mananalig ito sa mga di-nakikitang bagay na wala pang sagot ang agham at teknolohiya. Sa kabilang dako, ang pagiging mortal ng tao ay nawawakasan sa lakas ng kaniyang isip na may kapangyarihang magplano, lumikha, manggagad, umimbento, at magdisenyo; at makairal sa guniguni upang ang larang ng guniguni ay magkaroon ng buto’t laman sa realidad. Ang Isip ng Tao ang maaaring nagkakarga ng konsepto, pamahiin, paniniwala, pakahulugan, at pahiwatig sa isang bagay upang ang bagay na ito ay maging tulay ng tao mulang dimensiyong materyal tungong espiritwal. Kaya dumarami ang “lucky charms” na bulaklak ng dila para sa “agimat” o “pantaboy ng malas” na ipinalalaganap ng mga eksperto sa feng shui at astrolohiya.

Pinaniniwalaan ang agimat sa bisa nito. Halimbawa, ang susing may dalawang dahon, pakpak, at mutya na popular noon sa Binangonan, Rizal ay hindi karaniwang susi na magbubukas ng pinto. Magbubukas ng dimensiyong espiritwal ang nasabing susi, upang ang tao na may hawak nito ay makatulay sa larang ng guniguni mula sa daigdig na pisikal at materyal. Kung hihiramin ang konsepto ng Kadungayan ng mga Ifugaw, ang Kadungayan ay daigdig na tinutuluyan ng mga kaluluwa, at makapapasok lamang dito ang tao kung siya ay mamamatay o kaya’y magtataglay ng pambihirang susi na makapagbubukas ng dimensiyong espiritwal. Ang Kadungayan ay salamin ng pisikal na daigdig, at kung ano ang nagaganap sa daigdig ay nagaganap din sa Kadungayan. Maaaring bago maganap sa pisikal na daigdig ang isang pangyayari, gaya ng digmaan o taggutom, ay naganap na iyon sa daigdig ng mga kaluluwa. Ang pisikal na daigdig ay maaaring ekstensiyon lamang ng Kadungayan, o maaaring kabaligtaran, kung ipagpapalagay na parang sirang plaka lamang na inuulit sa Kadungayan ang naganap sa pisikal na daigdig at wala nang panghihimasok na magagawa pa ang tao, maliban na lamang kung mamamagitan ang puwersang sobrenatural.

Kaakit-akit ang agimat dahil ang isang karaniwang bagay ay lumalampas sa ordinaryong pagtingin ng madla. Ang anting-anting, gaya ng ipinamalas ni Nardong Putik o Pepeng Agimat, ay nagiging mabisa sa ating guniguni upang malunasan ang sakit, paghihirap, at kung minsan, kaalipnan ng tao. Sa oras na maging agimat ang isang bagay, ang bagay na ito ay mawawakasan ang tungkulin bilang karaniwang panyo, susi, at kuwintas na pawang materyal na magagamit ng tao. Kailangang taglayin ng agimat ang mabigat na tungkuling iniaatas dito ng Maylikha nito, at iyon ay maging kasangkapan ng tao na lampasan ang anumang pagiging karaniwan. Magsisimula ito sa mga sagisag, pakahulugan, at pahiwatig na pawang hindi mauunawaan mismo ng bagay, bagkus ng mga tao lamang na naniniwala sa kakayahan ng isip na dumako sa dimensiyong kamangha-mangha sa abot ng ating karanasan at kaalaman. Kapag nabigo ang agimat na gampanan ang tungkulin nito batay sa natatanging pakahulugan, pahiwatig, at sagisag na pawang ibinigay ng sinumang maylikha nito’t siyang pinaniniwalaan ng mga deboto, mawawakasan ang turing dito na pagiging agimat, at kailangang magbalik sa sinaunang silbi nito. Tatawagin yaong walang talab, walang bisa, kahit labis-labis ang inaasahan ng tao na tila nasisiraan ng ulo.

32 Tugon

  1. panu poh magkakabisa ang agimat na dasal tolad ng lakas ng kamay sa bubuhatin ganito BATO CRISTE ARMA BACALARA

    • Hindi ko alam, ngunit ang bisa ng agimat ay nasa pananaw ng naniniwala.

      • tama

  2. paanu poh ba ang magkaroon ng bisa sa agimat na dasal anu poh bang idinadasal u twing gabi poh naiintindhan k poh k u salamat poh pagpalain poh kayo ng jesus at sana poh ay pakinggan nya lahat ng dasal k poh at pannu poh bang makakuha ng agimat sa puso ng saging tiis tiis lng poh ba sa paghihintay at kong sakali makuha mo na meron poh bang makakalaban na hindi karaniwang tao

    • Hindi mo na kailangan pang magtiwala sa anumang agimat. Dapat mong tuklasin ang tiwala sa sarili; at ang sariling talino, talento, at lakas upang umiwas sumandig sa bagay na walang kapangyarihan.

  3. Ang agimat ay kusang mabubuhay sa katauhan ng may-ari nito. Kailan mabubuhay? Iyon ang hindi ko alam.

  4. Magandang araw mga kapatid sa Liwanag,
    alam ba ninyo sa matandang panahon ang mga Hebreo ay nagsusuot na ng agimat sa braso at noo. Tawag nila diyan ay Tefillin. Magpahanggang ngayon ay kanilang ginagawa iyan lalong lalo na sa kanilang pagdarasal sa sinagoga. Tama ang sinabi mo sa itaas na ang kaisipan ang pinaka-makapangyari ngunit kung wala ang mga vocales hindi ka makakaanyo ng ano mang ibig mong ianyo. Ang vocales ay ang kapangyarihan at katangian ng Dakilang Manlilikha. Sa pasimula ay salita, at ang salita ay nagsa-Deus at ang salita ay Deus, vocales.
    Pagibig at pagpapala sa lahat! Ismael

  5. AKO AY MAY AGIMAT AT EPEKTIBO ITO BATA PA AKO NG NAKUHA KO NA ITO INILILIGYAS AKO SA KAPAHAMAKAN NG AGIMAT KO

    • anong klasing agimat yan sayo sir?

      • Ang agimat ko ay pang-akit ng sisiw.

  6. gusto ko pong magkaroon ng agimat.bigyan nyo po ako

    • Magtiwala ka sa sarili, at pahusayin mo ang sarili sa alinmang larangang nais mong piliin. Iyan ay higit pa sa pagtataglay ng agimat.

  7. isang araw kumakain ako sa isang karenderya, nagulat nlang ako nung malapit ko na maubos yung kinakain ko, may nakain akong pangil.. ndi ko maintindihan kung bat may pangil sa kinakain ko at nagtataka ako kung bat may pangil sa sabaw.. samantalang ang laman nito ay pawang mga lamang loob ng kalabaw lamang.. bigla ko naisip na baka agimat eto, kasi matagal na akong naniniwala sa mga agimat.. gusto ko lng mabigyan ng kasagutan kong anong ibig sabihin nito?.. o maaring hindi lng cguro na check ng maayos ang pagka luto..?.. sana may sumagot d2…

    • Marahil ay may pagkakamali ang kusinero at hindi lamang niya nakita ang pangil. Wala kapangyarihan ang pangil, maliban na lamang kung bibigyan mo ng pakahulugan na higit sa dapat taglayin nito.

  8. Bakit may nabalitaan na ba kayong sumikat sa agimat?

    • Mayroon, ngunit nagkataong artista lamang sa pinilakang tabing.

  9. totoo ba talaga ang agimat..? o pawang kathang isip lamang..?

    • Basahin mo ulit ang aking artikulo, at malalaman kung totoo o hindi ang agimat.

  10. meron po ba pang kontra sa multo ung kapag pinaglalaruan ka

    tapos isang salita mo lng hndi ka nya pag lalaruan

    pede makahingi kahit isa lng

    • Magtiwala ka sa sarili, at walang sinumang multo ang makapananakit sa iyo.

  11. gusto ko po matutung lihim na kaalaman at magtaglay ng agimat o mutya sana matulungayn nyo po ako txt nyo po ako 09069110817

    • Ikinalulungkot ko, ngunit wala akong maibibigay na agimat sa iyo kundi ang payo na magtiwala ka sa sarili, at pagyamanin mo ang sariling kakayahan upang magtagumpay. Hindi mo kailangan ang agimat; bagkus ang pananalig sa sariling kakayahan.

  12. paano makakuha ng mutya ng kidlat pag kumukulog at kumikidlat ba po, at may takdang oras ba po ito kung kailan dapat kunin at taglayin?

    • Wala kang makukuhang mutya sa kulog man o kidlat. Ang mutya ay nasa iyong kalooban.

  13. Tao na gagawa ng kapalaran. Nasa diyos ang awa, nasa tao ang gawa. Saludo po ako sa mga payo ninyo. Natutukoy ko po ang mga punto ninyo.

  14. samay anting lang b iun

  15. may nbsa po ko d2 na oracion na png buhay at png palakas ng anting-anting pde po b ito sa medalyon ni san benito na png buhay at pde po b mahingi ang susi nto na oracion?

    • Wala akong alam diyan.

  16. pwd kuba malamn ang mga orasyn tungkol sa mga agimat. Paki pm nalang po plzz.. Reyn daclan@yahoo.com

    • Hindi kailangan ng tao ang orasyon; bawat tao ay may kapangyarihan na dapat lamang niyang tuklasin.

  17. an0 po kya 2 plz. answer me..xa kabaitan nang bata pa ak0 bag0 mamatay ang aking lolo,may bgay siya saken sabi nya ay ngipen nang kalabaw at itago k0 daw na wlang makaalam kahet kapatid,,sa 220 lng c tatay lng may alam 2 ,at mula ngaun 10 ak0 na wala pa ak0ng na2k lasan pa per0 alam u pag su0t k0 2 napakalakas ko un lng ung lakas lng ang nat0k lasan k0…sabi ng familya k0 ililihim namin 2 .per0 alam u gus2 k0ng ipaalam sain u dahil nde ko alam an0 kya 2.baket kya napakalakas ko..

    • May mga bagay na mahirap ipaliwanag, gaya lamang ng kapangyarihan ng isipan (mind) at kamalayan (consciousness) ng tao.

Mag-iwan ng Tugon

Fill in your details below or click an icon to log in:

WordPress.com Logo

You are commenting using your WordPress.com account. Log Out / Palitan )

Twitter picture

You are commenting using your Twitter account. Log Out / Palitan )

Facebook photo

You are commenting using your Facebook account. Log Out / Palitan )

Google+ photo

You are commenting using your Google+ account. Log Out / Palitan )

Connecting to %s

%d bloggers like this: